ރާއްޖޭގެ ރައީސުލް ޖުމްހޫރިއްޔާ އަދި ޑީއާރްޕީގެ ޒައީމް އަލްއުސްތާޒް މައުމޫން އަބްދުލް ގައްޔޫމަށް މިއަހަރު އޮންނަ ރިޔާސީ އިންތިހާބުގައި ވާދަނުކުރެއްވޭގޮތަށް ރައްޔިތުންގެ ހާއްސަ މަޖިލީހުން  ފާސްކޮށްފިއެވެ. ރައްޔިތުންގެ ހާއްސަ މަޖިލީހުން މިގޮތަށް ފާސްކުރީއިއްޔެ އޮތް އެމަޖިލީހުގެ238ވަނަޖަލްސާގައި މަޖިލީހުގެ 60އަށްވުރެ ގިނަ މެމްބަރުންގެ ތާއީދާއެކުއެވެ. އޭގެތެރޭގައި ޑީއާރްޕީގެ ވަރަށް ގިނަ އަދަދެއްގެ މެމްބަރުންވެސް ހިމެނެއެވެ.  މިކަން ސިފަކުރައްވާ އެސްއެލްޕީގެެ އިސް މެމްބަރެއްކަމަށްވާ ރައްޔިތުންގެ ހާއްސަ މަޖިލީހުގެ މާލޭގެ އިއްޒަތްތެރި މެމްބަރު މުހައްމަދު ނަޝީދު (ކާނަލް) ވިދާޅުވީ މައުމޫނަށް އެހެރީ މިހާރު ބޮނޑި ބޮވިފައިކަމަށެވެ.

"ރައީސް މައުމޫނަށް އެހެރީ ބޮނޑި ބޮވިފަ. ދެން ލަލަލާ" އެސްއެލްޕީގެ އިސްމެމްބަރު ކާނަލް މިއަދު ފޯނުން ވާހަކަދައްކަވަމުން ވިދާޅުވިއެވެ.

ރައްޔިތުންގެ ހާއްސަ މަޖިލީހަށް އެ އިސްލާހް ހުށަހެޅީ ޑީއާރްޕީގެ މެމްބަރު މުހައްމަދު ސަލީމް (ހޯރަފުށީ ސަލީމް)އެވެ. މިއަށް ތާއީދުކުރެއްވީ ޑީއާރްޕީގެ ޕާލިމެންޓްރީ ގްރޫޕްގެ ރައީސާ އަނީސާ އަހްމަދެވެ.

އެއިސްލާހުގައިވަނީ "ރިޔާސަތުގެ ދައުރު 2.(ހ) ރައީސުލްޖުމްހޫރިއްޔާކަމުގެ ދައުރަކީ ފަސްއަހަރު ދުވަހެވެ. އަދި، މިޤާނޫނުއަސާސީގެ ދަށުން ރައީސުލްޖުމްހޫރިއްޔާގެ މަޤާމަށް އިންތިޚާބުކުރެވޭ އެއްވެސް މީހަކަށް ވިދިވިދިގެން ނުވަތަ އެނޫން ގޮތަކަށްވެސް ދެ ދައުރަށްވުރެ ގިނަ ދުވަހު ރައީސުލްޖުމްހޫރިއްޔާކަމުގެ މަޤާމެއް ނުފުރޭނެއެވެ." މިހެންނެވެ.

ރައްޔިތުންގެ ހާއްސަ މަޖިލީހުގެ ރައީސް އިއްޔެގެ ރިޔާސަތުގައި އިންނަވާ ވިދާޅުވެފައިވަނީ ރާއްޖޭގެ ރައީސުލް ޖުމްހޫރިއްޔާ ރައްޔިތުންގެ ހާއްސަ މަޖިލިސް އެއްކުރެއްވީ "އައު ގާނޫން އަސާސީއެއް ހެދުމަށް ނޫން"ކަމަށާއި "މިހާރު އަމަލުކުރެވެމުންދާ ގާނޫން އަސާސީ އިސްލާހްކުރުމަށް" ކަމަށެވެ. އެހެންކަމަށްވާނަމަ އިސްލާހް ކުރެވޭ ގާނޫން އަސާސީގައި (17 އަހަރުން ހެދި ގާނޫން އަސާސީ)ގައި ރައީސް މައުމޫންވަނީ ދެ ދައުރު ފުރިހަމަކޮށްފައެވެ. އެހެންކަމުން އެމަނިކްފާނަށް މިހާރުވަނީ ރައީސްކަމަށް ކުރިމަތިލުމުގެ މަގު ބަންދުވެފައެވެ.

އިއްޔެ ހަވީރުއޮތް ޖަލްސާއަށްފަހު މަޖިލިސްކުރާ ގޭދޮރުމަތީ ވަރަށްގިނަ އިއްޒަތްތެރި މެމްބަރުންވަނީ އުފާފާޅުކޮށް ހިތްހަމަޖެހުމުގެ ޝުއޫރުތައް ފާޅުކޮށްފައެވެ. މިގޮތުން އެއްވެސް ޕާޓީއަކަށް ނިސްބަތްނުވާ ރައްޔިތުންގެ މަޖިލީހުގެ ރ. އަތޮޅުގެ މެމްބަރު އަލީ ވަހީދް ވިދާޅުވީ "ތިބޭފުޅުން އެއްގޮތަކަށްވެސް ހީފުޅުނުކުރައްވާތި މިއީ އަޅުގަނޑުމެން މެމްބަރުން ކުރިކަމެކޭ. މިއީ ﷲގެ ކުޅަދުންވަންތަކަން. މާތްރަސްކަލާނގެ އިރާދަކުރެއްވުމުން ޑީއާރްޕީ މެމްބަރުން އަތުން ރައީސް މައުމޫން ވެރިކަމަށް ކުރިމަތިލުމުގެ މަގު ބަންދު މިވީ." އެވެ.

ރައްޔިތުންގެ ހާއްސަ މަޖިލީހުގެ އައްޑު އަތޮޅުގެ މެމްބަރު އަދި ރާއްޖޭގެ ކާމިޔާބު ގާނޫނީ ވަކީލް އަލްއުސްތާޒް ހުސްނުއް ސޫއޫދް ވިދާޅުވީ މިނިންމުން ދެން ބަދަލުކުރެވޭނީ ހައިކޯޓަށް ކަމަށާއި ޑީއާރްޕީން ހައިކޯޓަށް އެޕީލް ކުރިނަމަވެސް އެނިންމުން ބަދަލުކުރެވޭނެކަމަށް ގަބޫލުނުކުރެވޭކަމަށެވެ. ސަބަބަކީ މިމައްސަލައަކީ ވަރަށް ސާފްކޮށް އިނގެން އޮތް މައްސަލައަކަށްވާތީކަމަށް ސުއޫދް ވިދާޅުވިއެވެ.

މިމައްސަލާގައި އެމްޑީޕީއާއި އިދިކޮޅު އެހެނިހެން ފަރާތްތަކުން އުފާ ފާޅުކުރަމުންދާއިރު ޑީއާރްޕީންވަނީ ރޭ ކުއްލި ނޫސްވެރިންގެ ބައްދަލުވުމެއް ބާއްވާފައެވެ. އަދި ރައީސް މައުމޫނަށް ވެރިކަމަށް ކުރިމަތިލެވޭނެކަމަށް ތަފާތު ހުއްޖަތު އެމީހުން އަންނަނީ ދައްކަމުންނެވެ. މިގޮތުން މިއީ އިސްލާހްކުރެވޭ ގާނޫން އަސާސީއެއް ނޫންކަމަށާއި މިއީ މުޅިން އަލަށް ހެދޭ ގާނޫން އަސާސީއެއްކަމަށް ރައްޔިތުންނަށް ވިސްނުވައިދިނުމަށް ޑީއާރްޕީންދަނީ ގަދައަޅާ މަސައްކަތްކުރަމުންނެވެ.

މިމައްސަލަ ސުޕްރީމް ކޯޓަށް ގެންދިއުމުގެ ހިޔާލެއް ގެންގުޅުއްވަންތޯ އާޒިމާ ޝުކޫރް އަރިހު އެހުމުން ވިދާޅުވީ އެމަރުހަލާއަށް ދިޔުމުން އެކަންތައްވެސް ކުރާނެކަމަށެވެ. ނަމަވެސް ޑީއާރްޕީގެ މެމްބަރުން އެއިސްލާހަށް ވޯޓްދިނީ މިހާރު ހާއްސަ މަޖިލީހުން "މިހަދަނީ އައު ގާނޫން އަސާސީއެއް"ކަމަށް ބަލައިގެންކަމަށްވާތީ މިއީ ސާފްކޮށް ރައީސް މައުމޫނަށް މިއަހަރު އިންތިހާބުގައި ކުރިމަތިލެވޭގޮތަށް ފާސްވި އިސްލާހެއްކަމަށް ގަބޫލުކުރައްވާކަމަށް އާޒިމާ ވިދާޅުވިއެވެ. ނަމަވެސް ރައީސުލް ޖުމްހޫރިއްޔާ ރައްޔިތުންގެ ހާއްސަ މަޖިލިސް އެއްކުރައްވާފައިވަނީ މިހާރު އމަލު ކުރެވެމުންމިދާ ގާނޫން އަސާސީ އިސްލާހްކުރުމަށް ކަމަށް ގިނަބަޔަކު ޤަބޫލްކުރެއެވެ.