ދިވެހި ރައްޔިތުންގެ ޕާޓީ (ޑީއާރްޕީ)ގެ ރަސްމީ ވެބްސައިޓުގައި، އެޕާޓީގެ ޒައީމް އަލްއުސްތާޛު މައުމޫން އަބްދުލްޤައްޔޫމްގެ އިސްތިއުފާއަށްގޮވައި، އެމަނިކުފާނުގެ އަބުރުފުޅަށް ހުތުރުވާފަދަ ކާޓޫނު ފޮޓޯތަކެއް ޝާއިއުކޮށްފިއެވެ. މިފަދަ ހަރަކާތްތަކެއް އެޕާޓީގެ ރަސްމީ ވެބްސައިޓުން ފެނުމުން، މިއީ ކިހިނެއް ވެގެން އުޅޭކަމެއްތޯ އޮޅުންފިލުވާލުމަށް ޑީއާރްޕީގެ އިސްތަރުޖަމާން އިބްރާހިމް ޝާފިޢުއާއި ގުޅާލުމުން ޝާފިޢު ވިދާޅުވީ، ޑީއާރްޕީގެ ރަސްމީ ވެބްސައިޓާއި، އަދި ޑީއާރްޕީން ނެރޭ ހަމަރޯޅި ނޫހުގެ ވެބްސައިޓުވެސް ކޮންމެވެސްބަޔަކު ހެކްކުރީ ކަމަށެވެ. ހަމަރޯޅި ނޫހަކީ ޑީއާރްޕީގެ ރަސްމީ ޕްރިންޓް މީޑިއާއެވެ. "އަޅުގަނޑު ހެނދުނު ތެދުވިތަނާ ތިޚަބަރު ލިބުނީ. ކޮންމެވެސް ބަޔަކު ހަމަރޯޅި ނޫހުގެ ވެބްސައިޓާއި ޕާޓީ ވެބްސައިޓް ހެކްކުރީ. މިހާރު ދިރާގަށް އެކަން އަންގައިގެން މަސައްކަތްތައް ކުރިއަށްއެބަދޭ" ޑީއާރްޕީގެ އިސްތަރުޖަމާން އިބްރާހިމް ޝާފިއު ވިދާޅުވިއެވެ.

ރައީސް މައުމޫންގެ އިސްތިއުފާއަށް ގޮވުމުގެ އިތުރަށް،  ހެކްކުރުމަށްފަހު ޑީއާރްޕީގެ ވެބްސައިޓަށް އަރުވާފައިވާ ރައީސް މައުމޫންގެ އަބުރުފުޅަށް ހުތުރުވާ ކާޓޫނު ފޮޓޯތަކަކީ، އިދިކޮޅު ފަރާތްތަކުން ހިންގާ ވެބްސައިޓްތަކުގައި ޝާއިޢުކުރަމުންދާ ފޮޓޯތަކެއްކަން ފާހަގަކުރެވެއެވެ. ޑިއާރްޕީގެ ވެބްސައިޓްގައި ހުރި އިސްތިޢުފާގެ ލިއުންތަކާއި، ކާޓޫނު ފޮޓޯތައް މިއަދު ހެނދުނު  10:30 އެހާކަންހާއިރުން ފެށިގެން ފެންނާކަށްނެތެވެ. އޭރު އެވެބްސައިޓުގައި ޝާއިޢުކޮށްފައިވާ ލިއުމެއްގައި ވަނީ "ސައިޓު ކުރިއެރުވުމަށް ވަގުތީގޮތުން ސައިޓު ބަންދުކުރެވިފައި" ވާކަމަށެވެ. އޭގެފަހުން މިއަދު މެންދުރުފަހު 13:00 ގައި ޑީއާރްޕީގެ ރަސްމީ ވެބްސައިޓުވަނީ ފުރިހަމައަށް އަޕްލޯޑްކޮށްފައެވެ.