ރައީސް މައުމޫން ބޮޑުތިލަދުންމައްޗަށް ކުރެއްވި ދަތުރުފުޅުގައި މިދިޔަ އަންގާރަދުވަހުގެ ހެނދުނު ހޯރަފުށީގެ ރައްޔިތުންނާ ސަލާމް ކުރައްވަމުންދަނިކޮށް، މީހަކު ވަޅިއަކުން އެމަނިކުފާނަށް ޙަމަލާދޭން އުޅުނު މައްސަލައާއިގުޅިގެން، މާލެތެރޭގައި ތަފާތު ގޮތްގޮތަށް ވާހަކަތައް ދެކެވެމުން އެބަދެއެވެ. ބައެއް ފަރާތްތަކުން ބުނާގޮތުގައި ރައީސް މައުމޫނަށް މަސްވަޅިޔަކުން ހަމަލާދޭން އުޅުނު ހާދިސާއަކީ "ކުޅެފައިވާ ޑްރާމާ" އެއް ކަމަށެވެ. މިހާދިސާއަކީ ދާދިފަހުން ސަރުކާރުން އިސްތިއުފާ ދެއްވި ވަޒީރުން ރާވައިގެން ހިންގާފައިވާ އަމަލެއްކަމަށް ދެއްކުމަށް ޑީއާރްޕީގެ މީޑިއާތަކުން މަސައްކަތްކުރަމުން އަންނަކަމަށްވެސް ގިނަބަޔަކު ތުހުމަތު ކުރެއެވެ.

މިކަމާއި ގުޅިގެން ޑރ. ހަސަން ސައީދާއި މިނޫހުގެ ފަރާތުން ގުޅާލުމުން ވިދާޅުވީ، އެހަމަލާއަކީ "ކުޅެފައިވާ ޑްރާމާއެއް" ކަމަށް ދެކެވޭ ވާހަކަތަކަށް އެއްވެސް އެއްޗެއް ވިދާޅުވާން ބޭނުންފުޅު ނުވާކަމަށެވެ. އެކަން ނިންމާނީ ރައްޔިތުންކަމަށެވެ. އަދި އޭނާއަކީ އެއްވެސް އިރެއްގައި މާރާމާރީއާއި ޓެރަރިޒަމަށް ހިތްވަރުދީ ވާހަކަދައްކާ އަދި އެފަދަ ކަމަކަށް ތާއީދުވެސް ކުރާ މީހެއް ނޫންކަމަށްވެސް ޑރ.ޙަސަން ވިދާޅުވިއެވެ. ސަރުކާރުން އިސްތިއުފާ ދެއްވި ދުވަހުން ފެށިގެންވެސް މަސައްކަތްކުރަމުން އަންނަނީ ރައްޔިތުންގެ ހައްގުގައިކަމަށާއި، އިސްތިއުފާ ދެއްވި ދުވަހުން ފެށިގެން މިއަދާއި ހަމައަށްވެސް ދެއްވި އެއްވެސް ވާހަކައެއްގައި މީހެއްގެ އަބުރަށް ހުތުރުވާގޮތަށްވެސް ވާހަކަފުޅު ދައްކާފައިނުވާނެކަމަށް ވިދާޅުވިއެވެ.

ޑރ.ހަސަން ސައީދާއި އޭނާގެ ބައިވެރިން ޑީއާރްޕީން އިސްތިއުފާ ދެއްވިދުވަހުން ފެށިގެން ޑީއާރްޕީގެ ރަސްމީ ނޫސް "ހަމަރޯޅި" އިން އަންނަނީ ޑރ. ޙަސަން ސަޢީދާއި އަދި އޭނާގެ ބައިވެރިންނާބެހޭގޮތުން ތަފާތު ވާހަތައް ތަފާތު ގޮތްގޮތަށް ފަތުރަމުންނެވެ. މިގޮތުން މިމަހު 6 ވަނަ ދުވަހުގެ ހަމަރޯޅި ނޫހުގައި އަހްމަދް ނިހާންގެ ނަމުގައި ލިޔެފައިވާ ލިއުމެއްގައިވަނީ ޑރ.ޙަސަން ސަޢީދާއި، ޑރ. ޝަހީދު، ރައީސް އުތުރަށް ދަތުރުފުޅުކުރައްވަން އުޅުއްވާކަން އެނގިގެން މީހުންނަށް ފައިސާދީގެން ޓެރަރިޒަމަށް ހިތްވަރުދެމުންދާކަމަށެވެ. "އުތުރުގެ އަތޮޅުތަކުގެ ރައްޔިތުން މަގުފުރެއްދުމަށް މިހާރު އެއަތޮޅަށް ދަތުރުތަކެއް ކުރަމުންދާ އިންޤިލާބީ އިއްތިހާދުގެ ބާނީ ޙަސަން ސައީދާއި ޝަހީދާއި ދެމީހުން ނިއުމޯލްޑިވްސް މޫމަންޓްގެ ނަމުގައި ޓެރެރިޒަމްއަށް ހިތްވަރުދޭން ފަށައިފިކަމަށް އަޑުތައް ފެތުރެން ފަށައިފިއެވެ ހއ.ދިއްދޫގެ ޒުވާން ކުދިންކޮޅެއް އެކަހެރިކޮށް އެކުދިންނަށް ފައިސާގެ ދަޅަދެއްކުމަށްފަހު ޙަސަނާއި ޝަހީދު އެދިފައިވާ ކަމުގައި ޚަބަރުތައް ފެތުރެމުންދަނީ ރާއްޖޭގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ތިލަދުންމަތީ އުތުރުބުރީގެ ބައެއް ރައްތަކަށް ދަތުރުފުޅެއް އެބަފައްޓަވާ ކަމަށާއި، މިދަތުރުފުޅުގައި އެމަނިކުފާނަށް އެކިކަހަލަ އުދަގޫތައް ޖައްސައިދިނުމަށެވެ. މީގެތެރޭގައި ޓެރަރިޒަމަށް ފެތޭ އެތައްކަމެއް ހިމެނޭކަމަށްވެއެވެ. ތިމަންނާމެންގެ ބޭނުމަކީ އިޞްލާޙޭ އަދި ތިމަންނާމެން މިއުޅެނީ ސިޔާސީގޮތުން ރަނގަޅު ވެއްޓެއް ރާއްޖޭގައި ޤާއިމު ކުރާށޭ، ކަރަޕް ޕޮލިޓިކްސް ނައްތާލާށޭ ބުނާބަޔަކު ޓެރަރިޒަމްއަށް ހިތްވަރުދީ ފައިސާދީގެން މިޒާތުގެ ނާތަޙްޒީބީ ޢަމަލު ކުރުމަށް އުޅޭކަމަށް އަޑުއެރުމަކީ ކޮންބާވަތެއްގެ ޑިމޮކްރަސީއެއްތޯ ޙަސަން ސަޢީދުކުރެން ދިވެހި ރައްޔިތުން ސުވާލުކުރަން ވެއްޖެއެވެ." މިހެން ލިޔެފައިވެއެވެ. ހަމަރޯޅި ނޫހުގެ އިއްޔެގެ އަދަދުގައިވެސް "ނިއުމޯލްޑިވްސް އާއި އިންގިލާބީ އިއްތިހާދުން "ޓެރަރިޒަމް"ގެ އަމަލުތައް ހިންގަން ފަށައިފި" މިސުރުހީގެ ދަށުން ފެކްޓެއްނެތް ވާހަކަތަކެއް ޝާއިޢުކޮށްފައިވެއެވެ.

މިކަމުގައި ހަސަން ސައީދުގެ ބަހަކީ "އަޅުގަނޑު ވަރަށް ހިތާމަކުރަން ގައުމެއްގެ ރައީސްކަން 30 އަހަރުކުރެއްވި ބޭފުޅެއް ނިސްބަތްވާ ޕާޓީގެ ރަސްމީ ނިއުސް ލެޓަރގައި ސާބިތުނުހިފޭ ދޮގު ވާހަކަތަކެއް ލިޔެފައި ހުންނާތީ. އަޅުގަނޑު ޓެރަރިޒަމަށް ހިތްވަރުދީފަ ވާހަކަދެއްކިކަން ހަމަރޯޅީގައި އެހެން ލިޔުނު މީހަކަށް ޔަގީންވަންޏާ އެކަން ޝަރީއަތަށް ހުށަހަޅަން ޖެހޭނެ. ސާބިތުނުހިފޭ ވާހަކަތަކެއް ކަމަށް ވަންޏާ އެފަދަ ވާހަކަތަކެއް ފަތުރާ މީސްމީހުންގެ އަބުރާ އިއްޒަތަށް އަރައިގަންނަނީ ކީއްކުރަންތޯ" މިއެވެ.

ޑރ.ހަސަން ސަޢީދު ވިދާޅުވީ، ރައީސް މައުމޫނަށް ދިން ހަމަލާއަކީ ހަސަން ދިން ހަމަލާއެއްކަމަށް ހެދުމަށް ސަރުކާރުންވެސް މަސައްކަތްކުރަމުން އަންނަ ކަމަށެވެ. މިގޮތުން ރައީސް ހޯރަފުށިގައި ދެއްކެވި ވާހަކަފުޅުގައި ސިޔާސީ ޕާޓީތައް އިތުރަށް ތަސައްރަފް ފުދެންވެއްޖެކަމަށް ވިދާޅުވި ވިދާޅުވުން ޙަސަން ފާހަގަކުރެއްވިއެވެ. ރައީސްގެ އިސްތަރުޖަމާން މުންދޫދު، އެދުވަހުގެ ޙަމަލާއާއިގުޅިގެން ވިދާޅުވެފައިވަނީ، މިކަމުގެ އަޑީގައި ތިބީ ޤައުމީ އެއްބައިވަންތަގުޅުމުގެ ބޭފުޅުންކަމަށާއި އެގުޅުމުގެ ފަރާތުން މިކަމަށް ޖަވާބްދާރީވާން ޖެހޭނެކަމަށެވެ.

"އެންމެ ފުރަތަމަވެސް ކަމެއް ތަހްގީގުކުރުމުގެ ކުރިން މިބުނަނީ މިވެނި މީހެކޭ އެކަން ކުރީ. ދެން ތަހްގީގްވެސް ކުރަން މިފަށަނީ. ދެން މިބަލަނީ އެމީހެއްގެ ދުވަސް ދުއްވާލެވޭތޯ. ދެން ކިހިނެއްތޯ ތަހްގީގެއް ރަނގަޅަށް ދާނީ. އެއުސޫލް ދޫކޮށް ސަރުކާރުވެސް އެބަޖެހޭ ތަންކޮޅެއް ތަސައްރަފްފުދެން މިކަހަލަ ވާހަކަ ދައްކާއިރު" ހަސަން ސައީދު ވިދާޅުވިއެވެ.

ރައީސަށް ހަމަލާއެއް ދޭންއުޅޭކަން "ހަމަރޯޅި" ނޫހަށް ކުރިން އެނގޭ؟
ރައީސް މައުމޫނަށް ހޯރަފުށިން ހަމަލާ ދިނުމުގެ ކުރިން އެމަނިކުފާނަށް "ޓެރަރިސްޓް" ހަމަލާއެއް އަންނާނެކަމުގެ ވާހަކަތަކެއް އެކި ދުވަސްމަތިން ހަމަރޯޅި ނޫހުން ފަތުރަމުން އައިސްފައިވެއެވެ. އެހެންކަމުން، ރައީސް މައުމޫނަށް މީހަކު ވަޅިން ދޭންއުޅުނު ޙަމަލާއާއިބެހޭ މަޢުލޫމާތު ޑިއާރްޕީއަށް ކުރިންވެސް އެނގޭކަމަށް ގިނަބަޔަކު ބުނަމުން އެބަގެންދެއެވެ. އަދި މިކަމަކީ ރައީސް މައުމޫނަށް ނާންގާ ޑީއާރްޕީގެ އެތެރެއިން ރޭވިފައިވާ ޕްލޭނެއްކަމަށްވެސް ބައެއް ފަރާތްކުން ތުހުމަތުކުރެއެވެ.

ރައީސް މައުމޫނަށް ދޭންއުޅުނު ޙަމަލާއާއިގުޅިގެން ހާމަނޫހުގައި ޝާއިޢުކުރަމުންދިޔަ ޚަބަރުތަކަށް އޮންލައިން ކިއުތެރިންގެ ތެރެއިން ގިނަ ކިއުންތެރިން ފޮނުވާފައިވާ ޚިޔާލުގައިވެސް ބުނެފައިވަނީ، މިޙަމަލާއަކީ ރޭވުމެއްކަމަށެވެ.